Bahan Khotbah Minggu 10 November 2013

MINGGU XXIV DUNG TRINITATIS, 10 NOVEMBER 2013

Ev. Roma 12: 17-21

Tema : Taluhon Hajahaton Marhite Ulaon na Denggan

I. Patujolo

Nunga lam mangimbukbuk (merajalela) be pangalaho hajahaton i lam tu pudian ni ari on. Lembaga Kepolisian Indonesia (Polri) di taon 2012 pabotohon, saleleng ni taon 2012 adong do 316.500 kasus hajahaton na masa. Media Massa Tribun News mandok, ganup 1 minut 31 detik (91 detik)[1], sai adong ma sada kasus na tubu. Angka kasus on masa do i sopola marnida umur, jenis kelamin, dohot status sosialna. Holan di Indonesia dope data on dah, ndang dope tasulingkit di bangso na asing. Jala holan na dapot dirongkom dope on, ndang dope angka kasus naso dapot dirongkom ala so sahat tu na berwajib. Manatap sian on, ndang pola ra na pajolohu molo dohonon paboa hajahaton i nunga lam merajalela di portibi on.

Sian dia do mula ni hajahaton i? Di mula ni panompaon i didok, “nunga denggan situtu” (1 Musa 1: 31) saluhutna ditompa Debata. Ndang adong dosa, ndang adong hajahaton, jala ndang adong hamatean. Alai, dung dilaosi si Adam dohot si Hawa hata ni Debata, na mandok na so jadi panganonnasida parbue ni hau parbinotoan na denggan dohot na roa (1 Musa 2:17), mamungka sian on ma masa pangalaho dosa, hajahaton, parungkilon dohot nang hamatean i na manggohi portibi on. Dipangke jolma na parjolo i do “kehendak bebas” na ni lehon ni Debata mangulahon na jahat, mangalo hata ni Debata. Jadi, hajahaton i ima hatangkangon ni jolma maradophon Debata. Jala ndang tolapna be rimpas laho patupahon angka na denggan i. Debata mangidohon nasida asa masihaholongan di bagasan ngoluna, alai ndang diulahon jolma i holong. Godang do na mangulahon holong i, alai godang do tong na mangulahon hajahaton i. Marhite i do asa gabe digombarhon portibi on songon sada inganan parporangan na denggan dohot na jat, daging dohot tondi. Songon dia jala boha do hita laho manaluhon hajahaton i marhita ulaon na denggan, hombar tu ojahan ni jamitanta minggu on?. Tapaihutihut ma hatorangan na di toru on.

II. Hatorangan

Laho pamatehon api na marsigorgor, ingkon pangkeon do alo ni api i sandiri ima aek. Laos songon i do laho manaluhon hajahaton i, ingkon pangkeonta do alona ima na denggan. Molo hajahaton tabahen alo ni  hajahaton, lam marsijembur do i. Tapukkul sasahalak, kemungkinan besar secara otomatis ibana pe balik mamukkul hita do. Sialani i do umbahen dipaingot apostel Paulus huria Rom asa unang mambaloshon na jat alo ni na jat.

Somalna parbue ni na jat alo ni na jat, gabe tubu ma balas dendam. Jadi ndang na jat bahenon alo ni na jat, ai boi do gabe tubu muse na jat na imbaru. Alai ingkon na denggan i do bahenon balosna, jala ido na pinodahon ni si Paulus tu halak Rom di jamita on. Tarlumobi hatia i ia huria na di Rom, ndang holan na marharoroan sian halak Jahudi sambing, alai adong do i nang sian angka bangso na asing. Dung i muse ia halak kristen Rom mansai otik do i martimbangkon sisomba debata ganaganaan. Alai nangpe torop so sadia nasida, molo pangalaho na denggan do dihangoluhon nasida, ingkon monang do nasida maralohon siulahon na jat na mansai torop i.  

Na mangihut, diajarhon do tu nasida asa “unang marlulu; pasahat hamu ma rimas i (tu Debata), ai tarsurat do: "Di Ahu do pamaloson, Ahu pe mamaloshon, ninna Tuhan i." Paulus mambuat hata on sian jamita ni si Musa tu halak Israel (5 Musa 32:35), na mangajarhon taringot tu huaso ni Debata di portibi on, na mangatasi sude huaso na adong di portibi on. Ragam bangso dihumaliang ni halak Israel di hatihai na naeng mangago nasida marhite sangkap hajahaton. Saluhutna i ndang margogo diadopan ni Debata, ai “Jahowa do marporang humongkop hamu, asal hohom hamu” (2 Musa 14:14). Hohom lapatanna dibagasan pangoloion tu Debata na berhak laho mamaloshon i.  

Paulus manambahon muse hata ni Debata sian Poda 25:21-22, dalan laho mangalo hajahaton i marhite ulaon na denggan: male musum, lehon ibana mangan; mauas ibana, painum! Asa, molo tapatupa si songoni, “songon na pagukgukkon gara do ho tu atas uluna”. Di Padan Na Robi, laho patuduhon panololion na dihajahaton naniulana, dipatuduhon do I marhite na dibahen disimanjujungna saspiring gara ni api. Sian i ma pangantusion “songon na pagukgukkon gara do ho tu atas uluna” tujuanna: marhite patupahon na denggan alo ni hajahaton, gabe manolosoli ma angka parjahat i jala marhamubaon.

III. Impola ni Jamita

1.      Di sada tingki, rap mardalan ma Kapak, Gergaji, Martil dohot Api. Di tongan dalan so ma nasida ala adong sada bosi baja na balga mangambati dalan nasida. Dung i, ro ma si Kapak manjonoki bosi i laho menghancurkan. Alai dung piga hali, ndang boi pultak bosi i. Ujungna mundur ma Kapak i, diuduti si Gergaji ma laho mamotong bosi i. Mulakulak dicoba gergaji ndang boi, malahan gabe sega gergaji i. “Mundur ma ho” ninna si Martil ma. Sagogogogona dibahen mangantuk bosi i, alai tong do dang boi, malahan gabe sampat ma Martil i tu pudi. Saonari giliran ni Api ma. Dipajonok ma tu bosi i, marhite panas na i gabe dihungkupi ma baja i. Lambat laun bosi baja i pe boi ma gabe meleleh jala hancur. Boi ma nasida manguduti pardalananna.

Hajahaton i pe jotjot songon bosi baja i, keras, ndang tarbahen manang ise laho mangambati hajahaton i. Nunga godang aturan laho mangatasi hajahaton na masa, alai lam manggasak do hajahaton i. Nunga dibentuk KPK, alai lam mangganas do kejahatan korupsi. Nunga godang teroris di hukum mati, alai molo jaringanna tong do pe adong sahat sadarion. Aha do na salah? Na hurang karas do uhum i? Manang hurang margogo angka penegak hukum umbahen lam tu gogona hajahaton i? Dison ma ringkot sada pendekatan naimbaru bahenon di tongatonga ni keluarga nang masyarakatta, i ma : Holong! Aturan dohot peraturan i naeng ma unang mardongan kekerasan, alai naeng ma didongani holong i. Aturan na didongani kekerasan, jotjotan menghasilkan pembangkangan. Alai aturan dohot peraturan na didongani holong, laho padengganhon, anggiat menghasilkan hamubaon di jolma i gabe mangulahon na denggan i di ngoluna.

2.      Angka dongan, dimulanai hita jolma on nunga ditompa Debata mansai denggan laho mangulahon na denggan. Alai dosa mambahen hita mangulahon na jahat, ndang diharingkothon be mangulahon na denggan. Tarlumobi ma di ari na parpudi on, sahira na monang do hajahaton i maradophon angka na denggan i. Ndang mabiar be jolma i mangalaosi patik ni Debata. sipata molo nipikkiran,:”Ala na so adong i do hukuman langsung tu angka parjahat i, songon hukuman penjara manang denda sian Debata, umbahen sai marjahat i jolma on?” Jala godang do pangantusion na salah taringot tu hamubaon i, dianggap boi do haduan i. “Di ari parpudi do anon jaloon uhuman i, anon ma na marhamubaon i songon parjahat na di siamun ni Jesus”. Naeng ingotonta, ndang dung di ari parpudi i hita dinilai Debata, alai saleleng hita mangolu di portibi on, i do na gabe ujian di hita laho patupahon na denggan i. asa songon hata ni endenta, no. 248 i, didok:” Saleleng ho di tano on Patigor ma roham Paingotingot ma tongtong Nidok ni Debatam”, na mangajarhon hita asa manongtong mangulahon na denggan i dibagasan ngolunta.

3.      Manaluhon hajahaton boi do taulahon marhite na manesa dosa. Dung na malua Paus Johanes Paulus II sian usaha pembunuhan ni sahalak na marsogo roha tu hakristenon, pintor ro do Paus i mandapothon halak na manembak i tu penjara. Sude halak tarsonggot, tarlumobi ma jolma manembak i, di na ro Paus mandapothon ibana di bagasan penjara. Disi, Paus olo manesa dosa ni jolma na jahat i. Disolsoli na jahat i do dosana jala gabe marhamubaon, ndang be mangulahon na jahat. Manesa dosa ni angka na jahat, bagian sian ulaon na denggan do i laho manaluhon hajahaton. Alani, molo olo hita manesa dosa ni angka dongan na jahat tu hita, sada dalan do i tu nasida asa marhamubaon sian hajahaton na i, gabe moru bilangan ni angka parjahat.

---

[1] Dikutip sian www.tribunnews.com, Rabu 26 Desember 2012.