Khotbah Minggu 27 Oktober 2013

MINGGU XXII DUNG TRINITATIS

27 OKTOBER 2013

Ev. Mateus 20: 20-28

Tema : Ro Laho Marhobas

I. Barita Masa

Dung sun Jesus mamodai/mangajari di Galilea, nangkok do Ibana tu Judea raphon angka siseanNa. Songon na di Galilea, di Judea pe torop do halak marrongomi Ibana. Di Judea on dipamalum Ibana do na marsahit, dipasupasu angka dakdanak, diajari natorop i taringot tu pardongan saripeon, taringot tu harajaon ni Debata, dohot angka lan na asing dope (Mateus 19).

Sian Judea nangkok ma nasida tu Jerusalem, laos torop do halak mangihuthon sian pudi. Huhut mardalan nasida dipaboa/dilumbahon Jesus do tu angka siseanNa i na naeng sitaononNa di Jerusalem muse. Boti didok Ibana, “Na nangkok do hita tu huta Jerusalem, jadi pasahatonna ma Anak ni jolma i tu angka sintua ni malim dohot tu angka sibotosurat, jadi marutang hosa ma Ibana uhumonna, jala pasahatonna ma Ibana tu angka parbegu; insahanna, tijuranna jala linsinganna ma Ibana, laos pusaonna do; alai mulak mangolu do ibana di ari patoluhon” (Mark. 10: 33-34; Mateus 20: 17-19). Umbege hata ni Jesus i tarsongot do angka siseanNa i laos mabiar nasida mangihuthon Jesus (Mark. 10: 32). Ai diboto nasida do paboa di Jerusalem do inganan ni angka simusu i Jesus. Alai  nangpe di bagasan biar nasida, sai tong do diihuthon Jesus sahat tu Jerusalem.

Dung sun dihatahon Jesus lumbalumbaNa i pintor tompu ma si Johanes, si Jakobus dohot si Salome inana (istri zebedeus) mandapothon Jesus. Marsomba do inanasida i laos dipasahat pangidoanna tu Jesus (Mat.20: 20)[1]. Jadi taringot tu alus-jawab (dialog) ni Jesus dohot halak on na tolu ma turpuk jamitanta sadari on.  

II. Hatorangan

Sian tutur parmudaron, marinanguda do Jesus tu si Salome ina ni si Johannes dohot si Jakobus on. Ai kakak ni si Salome do antong si Maria ina ni Jesus (Mat. 13: 55; Mark. 6: 3). Di situasi turpuk on, sian tutur parmudaron do nasida pasahathon pangidoanna tu Jesus. Na dianggap si Salome do Jesus i anakna umbahen barani ibana pasahathon pangidoanna di ombas i. Jala angka pande bisuk (penafsir) mandok, dibingkasi poda haimbaruon ni Jesus na tarsurat di Mat. 19: 28[2] i do umbahen dipangidohon si Salome anakna na dua i asa diloas hundul di sabola hambirang dohot siamunNa di harajaon sogot. Hira sude do pande bisuk satolop mandok ia si Johanes dohot si Jakobus naeng mangalului hundulan na humebat sian angka donganna sisean na asing. Di sub judul Bibel Toba Binddu 20 i pe didok do na mangalului hasurungan anak ni si Sebedeus.

Ndang pintor dioloi Jesus pangidoan ni si Salome on nangpe naung inangudana na mangido i, ala so diboto aha napinangidona i. Dirimpu si Salome do taringot tu harajaon portibi na hinatahon ni Jesus taringot tu hundulan hasangapon i. Lao tu rohana, tanda na marpamili hami tu Jesus on nanggo apala gabe menteri pe nian sogot anakhu na dua on dibahen Ibana. Lipe do pangantusion ni halak on tu pandohan ni Jesus na di tongan dalan i. Ido umbahen didok Jesus, ndang diboto hamu na pinangidomuna i (ayt. 22). Didok nasida muse dope na tarbaen nasida manginum siinumon dohot paridihon paridian ni Jesus na naeng masa i (ayt. 22d). Lam paltak ma naso diantusi nasida nanggo otik impola na hinatahon ni Jesus i. Sai dirimpu nasida do taringot tu harajaon portibi na hinatahon ni Jesus, hape taringot tu harajaon partondion do.

Umbege pangidoan ni sisean na 2 on, gabe sogo do roha sisean na 10 nai (ayt.24). Boasa? Ala nasida pe tong do ambisi gabe naeng na humebat. Jadi terjadi ma saling cemburu. Pola do huroha naeng main kekerasan nasida tu sisean na 2 i. Tarida do i sian pandohan ni Jesus uju dipapungu nasida laho padamehonsa. Didok, dirajai angka sigomgomi bangso do anak buana (pemerintah bangsa memerintah rakyatnya dengan tangan besi), jala dipatunduk angka na sangap do nasida (pembesar2 menjalankan kuasanya dengan keras/diktator) (ayt.25). Udutna di ayat 26 didok, unang ma songon i ianggo hamu. On ma cara parjolo dibahen Jesus maminsang pangalaho ambisi ni si seanNa i, paboa kekerasan ndang tepat laho  mangaluli hasurungan sian dongan. Cara paduahon didok ma muse, ingkon gabe parhobas (diakonos/pelayan) do iba asa dapot hasangapon di adopan ni Debata. Jala ingkon gabe naposo (doulos/hamba) do iba asa dapot gabe nomor sada/terkemuka (ayt. 26-27). Taringot tu son, amanta William Barkclay mandok, “ianggo di portibi on halak na gogo na dihabiari halak do jolma na sumangap, alai ianggo sisean ni Jesus halak na rade marhobas do na sangap di harajaon ni Debata. Dung i ndang halak na gogo mangasahon botohon songon pamarenta na diktator i halak na sumurung/nomor sada di adopan ni Debata, alai angka parhobas na serep marroha i do. Lapatanna, asa gabe na sumangap di harajaon ni Debata ingkon rade do hita gabe parhobas na serep roha di portibi on, ndang halak na ambisi dohot na mangasahon botohon. Laos pangalaho on do na pinatuduhon ni Jesus di portibi on (ayt. 28).

III. Impola tu Jamita

1.      Torop do halak di zaman modern on marprinsip asa lobi sangap dirina ingkon rarak do gelar na timbo di pudi ni goarna. Isarana; Ir, SH, M.Hum, MSc, Dr, Phd, dna. Tamba ni i ingkon marjabatan ma asa marbawahan ibana jala dihabiari hatana. Molo nunga songon i holan tinggal parenta nama antong sian ibana, sude ma bawahanna tarpaksa mabiar manang unduk melayani ibana, jadi sude ma haporluanna beres. Asa dapot sisongon on, mansam cara do dipatupa laho mangeahisa. Isarana, dituhor ijazahna, disogok jabatanna, dna. Na sai songon i ma na sangap na di portibi on umbahen didok Jesus, “na sangap dohot raja panggomgomi ni portibi on patundukhon anak buana marhite huasona hagogoonna”. Ndang gabe parhobas nasida marhite jabatanna i alai balik gabe sitau sihobasan ni anak bua sambing do. Halak Batak mandok, “ia angka raja di jolo siaduon do i jala dipudi sipaimaon”. Hombar tu pangalaho on do na pinaingot ni Tuhan Jesus tu siseanNa, jala didok unang ma songon i hamu molo naeng sangap di jolo ni Debata. Domu tu sipasingot ni Jesus on, nunga ingkon sipaubaon ni angka na sangap di portibi on prinsipna. Alana na sangap di harajaon ni Debata ndang marhite prinsip na sitau hobasan ni halak diriniba, alai ingkon unduk dohot serep do roha manghobasi halak na asing di haporluanna (ayt.26).

2.      Sude do jolma di sadasada tingki manghaporluhon pangurupion ni donganna. Jadi asa urupanna hita di tingkina, ingkon jumolo do hita rade mangurupi/manghobasi na ringkot di donganta. Antong unang ma nian adong sian hita halak kristen na marprinsip holan sitau, asa unang hapusohan hita uju manghaporluhon panghobasion ni donganta. Jala cara kekerasan dang denggan i pangkeon laho mamaksa halak mangurupi iba, tarlumobi ma ala adong huaso tiniop manang jabatan nihundulan. Torop do ama na mamaksa inantana manang ianakkonna manghobasi di ibana. Sabalikna, torop do ianakkon mamaksa natorasna paradehon haporluanna naso apala ringkot hian dope. Torop do pejabat kesempatan dalam kesempitan tu masyarakatna. Domu tu si do na hinatahon ni Jesus, “Manang ise hamu naeng parjolo ima gabe na poso di donganna” (ayt.27).

3.      Amanta Johanes Kalvin mandok, marlaok ambisi do haunduhon ni si Johanes dohot si Jakobus di na mangihuthon Jesus i. Jala pangidoan na marlaok ambisi pribadi, ndang dioloi Tuhan Jesus i. Ndang holan halak on na dua na olo songon i, alai hita sandiri pe jotjot do tartait tu si. Coba ma jo tapareso rumang partangiangonta, mansai jotjot egois holan mangidohon ambisi pribadinta. Jala na humebat tapaksa do Tuhan i laho mangoloi pangidoanta i. Sian turpuk on dapot hita parsiajaran paboa naso dioloi Ibana do pangidoan na sisongon i. Sada tiruan na dengan di hita sian pangalaho ni Jesus, ndang adong ambisi pribadi di Ibana alai olo mangalehon hosaNa humongkop torop jolma. Hombar tu tema ni minggunta on, toho ma tahe haroroNa laho marhobas sambing do. Antong hita pe unang adong na sitau dihormati, sitau dihobasi, alai gabe parhobas na tutu ma sopola nionjar ni imingiming, Amen!

IV. Ende

1. 24   : 4-5+8	3. 45   : 4+6	5. 466 : 1 ….	7. 485 : 1+3-4
2. 424 : 2-3	4. 476 : 2-3	6. 467 : 1+4

S. Patik:   Sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi! (2 Timoteus 4: 5).

---

[1] Alai molo tajaha di surat ni si Markus, holan si Jakobus dohot si Johannes do naro mandapothon Jesus laos pasahathon pangidoanna (Mark. 10: 35).

[2] Di Mateus 19: 28 didok di ari sogot di haimbaruon i, di nahundul anak ni jolma i di habangsa hasangaponna i, dohot ma hamu juguk di si di 12 habangsa manguhumi halak Israel na 12 marga i.