Bahan Khotbah Minggu 22 Desember 2013

SERMON EVANGGELIUM MINGGU 22 DESEMBER 2013

Mateus 3 : 1-12

Ginurithon ni: Pdt. RE. Sihotang, S.Si

Tema:

PARADE DALAN DI TUHAN I

I. Patujolo

Suara na joujou di halongonan:”Pauba hamu ma rohamuna” (bertobatlah). Sada panjouon asa marhamubaon, molo talapati hata on di bagasan Kamus Besar Bahasa Indonesia, adong 2 lapatanna: bertobat v( 1) menyesal dan berniat hendak memperbaiki (perbuatan yg salah dsb): dan (2) kembali kpd Tuhan atau agama (jalan) yg benar. Dibagasan bahasa gorik (Yunani), hata bertobat diterjemahon sian hata metanoia, lapatanna "berbalik 180 derajat dari kehidupan yang lama" atau "meninggalkan cara hidup yang lama". Halak na di jou asa marhamubaon/bertobat alani pangalahona naung maralo tu hasintongan, ditogihon asa “Manolsoli/Menyesal” di angka pangalahona na jotjot mangalaosi hata/patik ni Debata, jala dung sian i, gabe “Mulak/Kembali” tu dalan na dipangidohon Debata dibagasan hasintongan.

On do barita na diboan Johanes pandidi tu tongatonga ni halak Jahudi. Songon sahalak utusan ni Raja, Johanes di suru manjoloani dalan ni raja nanaeng ro i, Jesus Kristus, asa: Pature hamu ma dalan di Tuhan i; pahornop hamu ma sidalananna i!". Sude halak na mambege panjouon i. ditogihon tu hamubaon jala di didihon di aek Jordan. Padan na Robi mandok ia pandidion marhite aek peanindangion do i ias sian sude na jat dohot panosolion sian sude dosa (2 Musa 19:14-15; 3 Musa 16:4,24; Psalm. 51:4). Dibagasan ulaon ni Johanes pandidi, pandidion i ala naung marhamubaon, dohot manjoloani haroroni harajaon ni Debata na mamboan panguhuman na borat.

Alai molo tapamanat di turpuk jamita on, tarlumobi do panogihonon ni Johanes pandidi diarahon tu angka parise dohot saduse. Pintor asing do pamerengan dohot nang hata ni si Johanes tu angka parise dohot saduse. Boasa songoni? Tapaihutihut ma tafsiran na ditoru on.

II. Tafsiran

Tu angka natorop na ro manopot ibana sian Jerusalem, halak Judea ro di saluhut angka na maringanan di lambung ni Jordan i, sae do holan didok si Johanes: Pauba hamu ma rohamuna! Alai dompak halak Parise dohot saduse na ro di tingki i, ditambahi ibana do hatana i. Parise dohot Saduse, dua golongan/kelompok keagamaan dohot sosial politik na adong di tongatonga ni halak Jahudi. Tu na dua golongan on, tumpol do hatana manudu nasida jala digoari do nasida: anak ni ulok! Umbahen didok si Johanes nasida anak ni ulok, i ma si bolis na mangago si Adam dohot si Hawa di porlak Eden ( 1 Musa 3:15). Ro sian si bolis i do nasida, jala i do bapa nasida (tajaha Joh. 8:44). Anak ni ulok do nasida, ai sarupa do pangalahona. Nang pe maralo jala bersaing do nasida di tongatonga ni halak Jahudi berebut pengaruh, alai mardongan do nasida di na mangulahon hajahaton i. Jesus Kristus pe mangalehon goar na sarupa tu nasida (Mat. 12:34; 23:33). Dos songon ulok do nasida, nang pe bagak idaon di duru, alai gok rasun (beracun) jala gok dohot gabus, parpangansi, manegai tu angka na denggan. Bahkan, molo tajaha di Matius 23, tangkas dipatuduhon Jesus ia halak Parise dohot Saduse i ma halak na marjea, halak na mananda Debata alai ndang patuduhon panandaion na i.  

Parise dohot Saduse paburnanghon dirina sebagai pomparan ni si Abraham. Naeng dohonon nasida:”ai nabadia do hami, ndang pardosa songon angka bangso sileban; dipillit Debata do hami gabe bangsoNa, ndang rigkot be di didi hami”. Parbinotoan dohot pangulahononna nasida taringot tu uhum ni Debata, sai on do dipangasahon masida, alai ndang tarida i dibagasan parngoluanna. Jesus paingothon angka sisean i, asa manat tu pangajarion ni parise dohot saduse (Mat. 16:6). Ragi/asom, i ma pangajarion na diboan nasida, lam padaohon angka sisean i sian hasintongan ni Debata.

Johanes manogihon Parise dohot  saduse i asa marhamubaon, jala mamparbuehon parbue na denggan. Status nasida sebagai anak ni si Abraham ndang boi paluahon nasida sian uhuman na naeng ro. Molo so olo nasida marhamubaon, mariusuang ma sude parbinotoan nasida taringot tu uhum na sian Debata. Unang sanga salpu, ai naung rade do tangke laho manaba hau na so mamparbuehon na denggan. Jala di ari paruhuman i, di papulik Debata do angka eme sian angka hurangkam. Panjuaon ni nasida tu pandidion i, gabe sada tanda nasida pe manjua di asi niroha ni Debata. Kristus mandok: Alai anggo halak Parise dohot sipeop patik i, disundati do tahi ni Debata na taringot tu nasida, ai ndang dipadidihon dirina tu ibana Lukas (7:30).

III. Refleksi

1.    Hamubaon ni roha di bagasan ngoluna, i do na dipaima jala dihalomohon Debata sian jolma na tinompaNa. Angka panurirang andorang si Johanes Pandidi nunga mansoarahon panjouon i. Panurirang Hesekiel dohot tegas mansoarahon: “Dok ma tu nasida: Songon sintongna mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel? (Hesekiel 33:11). Panjouon na marulakulak manandahon holong ni Debata tu angka na tinompaNa. Ndang dihalomohon Debata masuk jolma i tu uhuman na salelenglelengna, baliksa tu hangoluan na selelalelena ma nian. Di son dituntut tanggapan ni jolma i laho mangoloi panjouon i laho manandinghon jala manundalhon dalanna na salah i, pangalaho na jahat i, gabe mardalan di dalan ni Debata jala mangulahon angka na denggan. 

2.    Panjouon ni Johanes pandidi tu halak Israel tingki i, tarlumobi dipasahat dohot tegas tu angka Parise dohot Saduse. Tu kelompok na mandok dirina sebagai golongan na sintong, pomparan ni si Abraham, dipaingot nasida asa marhamubaon. Terbukti do bahwa panandaion nasida tu Debata ndang mambahen nasida gabe halak na mangulahon HataNa. On gabe peringatan tu hita halak Kristen di tingki on na menganggap dirina sintong, mananda Debata alai ndang mangulahon HataNa, asa marhamubaon.  

3.    Di sada tingki, sahalak baoa terlibat parbadaan tu baoa na asing. Alani parbadaan i, gabe tarbunu ma alona i. Tontu sahali nunga melanggar uhum ibana, sehingga ingkon dipenjara mangihuthon uhum na masa. Alai, ala ndang olo hona uhuman, ndang olo dipenjara, gabe lari ma baoa na mamunu on maninggalhon hutana, keluargana, martabuni di sada inganan. Marhite na martabuni ibana ndang boi tangkupon ni polisi ibana, jala ndung pigapiga taon gabe lupa ma jolma di persoalan I gabe boi ibana mulak muse tu hutana. Godang terjadi hal na sisongoni di humaliangta, melarikan diri asa unang tartangkup jala diuhum. Boi ma nasida malua sian uhum ni portibi on, alai uhum ni Debata? Di son ma jotjot lupa jolma i, ia uhum na masa di ngoluna ndang holan uhum ni Negara, alai dohot do uhum ni Debata na manompa hita jolma. Dos tu partani na di tingko gotilon i papulik eme dohot sian angka hurangkam, songoni ma Debata manirang angka naburju tu angka parjahat. Ndang adong na boi “melarikan diri” sian uhuman ni Debata. Na ingkon ulahononta molo taulahon na jahat: marhamubaon sian na jahat i. 

Bahan Khotbah Minggu 15 Desember 2013

SERMON EVANGGELIUM MINGGU 15 DESEMBER 2013

Jesaya 35 : 1-10

Oleh: Pdt. MT. Pasaribu, S.Th

Tema:

PIR MA TONDIM

I. Barita Masa

Dungkon mate si Joas raja Juda na binunu ni si Zabad (Yozakar), si Amazia anakna i do manggotisa gabe raja di Juda. Marsigorgor situtu do rohana siala hamamate ni amana i. Ndang sadia leleng dibunu si Amazia ma si Zabad anak ni boru Moab na mamunu amana i, rodi sude angka pegawaina na terlibat di pamunuon i. Marojahan sian buku patik ni si Musa do si Amazia umbahen holan angka na terlibat i sambing dibunu ibana. Di Patik i didok, “Ndang jadi marutang hosa amaama ala angka anakna, angka anak i pe ndang jadi marutang hosa ala amana, ingkon ganup ala dosana sandiri mate” (5 Musa 24: 16).

Ndang sadia leleng borhat do halak Moab mangalo si Amazia na mamunu si Zabad i. Alai ala didongani Jahowa parangan ni si Amazia, monang do nasida maralohon halak Moab. Dungkon ditaluhon si Amazia halak Moab, ditahi ibana do paulakhon tano Edom[1] tu gomgoman ni harajaon Israel. Tardingkan purba (sebelah timur) ni Juda do hapeahan ni tano Edom, halak Seir angka pinompar ni si Esau do na saleleng on maringanan di si.

Dipapungu raja Amazia ma 30.000 halak pasukan porangna sian pinompar ni marga Juda dohot Benjamin naung marumur 20 taon tu ginjang, asa rap borhat nasida mamorang halak Seir pangisi ni tano Edom i. Dohot do raja Amazia turun lapangan manguluhon pasukan i tu adaran Asin (lembah Asin) jonokkon ni kota Sela. Siala didongani Jahowa, monang do nasida. Tarhira 10.000 halak toropna halak Edom i mate, jala tar 10.000 halaknai ditaban laos diboan tu punsuk ni dolok batu. Sian i ma nasida dipandanggurhon tu toru, gabe sude rage marmatean. Marhasil do nasida di parporangan i, saut do kota Sela dikuasai. Di pudian ni ari, kota Sela digoari ma i kota Yokteel (2 Raja-raja).

Nang pe naung dipatunduk jala dipaulak tu harajaon Juda kota Sela, tong dope ndang nok matanasida modom, ala sai disura rohana do sadihari hincat ma annon pasipasi ni bangso Edom rap dohot halak Moab mamorangi nasida. Di situasi na gok holso dohot hagangguon on ma turpuk jamitanta on dihatahon panurirang Jesaya. Didok tu nasida; PIR MA TONDIMU, unang hamu mabiar! Ida ma Debata Jahowa ro martubolhon dohot mamaloshon. Sai na ro do Ibana tongon paluahon hamu (ayt.4).

II. Hatorangan

Molo tajaha do di jolo ni turpuk jamita on (bindu 33-34), tangkas do dipabotohon di si, paboa naso holan bangso parbegu na ni rimasan ni Jahowa, alai bangsoNa sandiri pe dohot do. Antong molo songon i do parturena, na sarupa do ulaning pambahenan ni Jahowa tu angka bangso parbegu dohot tu bangsoNa sandiri?. Alusna, sasintongna “ndang”, sumurung dope pambahenanNa tu bangsoNa sandiri sian apala tu bangso parbegu. Dia ma huroha hasurunganna?. Dapot hita do alus ni i sian turpuk jamita on.

Ianggo tu bangso parbegu, ima na tinuduna bangso Edom, diparragehon do i pola mate marhortangan, bangkenasida pe sampe manogap bau tu ginjang, ala ni godang ni mudarnasida na durus i digombarhon do tu dolok na sampe malala (Jes.34:3). Lapatanna, ingkon sude do di tingkina mintop nasida bahenonNa. Alai ianggo tu bangsoNa, patupaonNa do hamubaon di sandok rumang ni parngoluonna (pemulihan yang luar biasa).

Digombarhon Panurirang Jesaya do parngoluon ni bangso Juda i andorang so dipauba/dipulihkan Debata, suman tu halongonan dohot tano bangkalbangkal (ayt.1). Jala ia dung dipauli bangsoNa i gabe dipatudos ma suman tu hamuliaon ni Libanon dohot haulion ni Karmel nang Saron (ayt.2). Luar biasa do na binahen ni Jahowa tu bangsoNa i, ai ndang mardebadeba dipauba alai tung saluhut do (secara menyeluruh). Dipamasa do hamubaon i di bidang ngolu pardagingon (fisik)[2], songon i di kondisi tano[3],  laos ihut do pemulihan sosial-keamanan[4], dohot pemulihan di bidang partondion (spritual)[5]. Na mansai ringkot peoponta, paboa masa pe angka hamubaon i saluhutna, Debata Jahowa sandiri do na patupahon i tu bangsoNa.

III. Impola tu Jamita

1.      Molo tapamanat do lam tu tingki na parpudi on ndang holan portibi (bumi) on be naung gok sahit, alai parrohaon dohot pangalaho ni jolma i pe nunga torop naung hona virus. Boi dohonon mansai umbuk do gombaran ni si Jesaya na di turpuk on tu parngoluonta saonari on. Nunga torop be parrohaon ni jolma i suman tu tombak longolongo (padang gurun) dohot suman tu tano bangkalbangkal (tanah tandus). Goarna pe tombak longolongo (padang gurun), so adong hangoluan di si, aek na palambokhon pe maol dapot, pokokna tahe gersang ma. Songon i do tong nang tano bangkalbangkal, so tubu suansuanan di si ala mansai tungil. Tapamanat ma lam tu ari na parpudi on, nunga gersang haporseaonta jala lam tungil parrohaonta.  Di situasi sisongon on, hirim do rohanta asa pamasaon ni Tuhanta hamubaon/pemulihan ni roha dohot pangalaho. Di Minggu advent on maimaima do hita di haroro ni Sipalua i mamboan hamubaon di parrohaon nang rumang ni ngolunta be. Anggiat dapot songon na ni lumbahon ni si Jesaya di jamita on, gok las ni roha ma halongonan dohot tano bangkalbangkal, marolopolop ma adaran.

2.      Somalna manjonokhon ari Natal, torop do jolma marlas ni roha. Marlas ni roha do angka partigatiga, ai godang ma langku tigatigana, isarana baju, sipatu dohot lan angka pahean na asing. Marlas ni roha do nang parpinahan, ai godang ma orderan binda. Marlas ni roha do nang sigadis pulsa, ai godang ma halak na mar-SMS mandok selamat Advend dohot selamat Natal tu angka sisolhot manang alealena. Marlas ni roha do nang angka dakdanak ai marpahean baru ma nasida marlitugi di gareja. Angka sijalo gaji pe tong do marlas ni roha, cair ma gaji ke-13na. Pokokna tahe boi dohonon hira sude ma marlas ni roha dohot marolopolop di na manomu haroro ni Sipalua i. Alai holan on nian, unang parejephu impola ni las ni roha i di tongatonganta. Jamita on manosohon, marhite haroro ni si Palua i ingkon pamasaonta do pemulihan sosial-keamanan, pemulihan pisik dohot pemulihan partondion. Di advent on naeng paradeonta dirinta laho patupahon hamubaon i tu na humaliang, tarlumobi ma di dirinta.

3.      Totu laho pamasahon angka pemulihan on, ima songon tanda ni parbue ni las ni roha na naeng paroon ni Sipalua i, godang do angka tantangan dohot hamaolon siadopanta. Tarmasuk hamaolon laho manaluhon roha diri. Mungkin torop do halak kristen na sapandohan tu pandok ni sahalak ama ruas ni hurianta on mandok, “ndang tarhona au manumbang tu Pantiasuhan Sarpat amang, ai ahu pe sisumbangon nama” inna. Hape tangkas do binoto loyar do parhepengonna, gok do pinahanna, manjalo sewa ni hauma do ibana ganup panen, laos holan pasangan/colokan togelna pe so binoto manang piga lembar ganup borngin, timbo muse isapisapna ai Djisamsu (123) do. Alai tega do amanta i manggabusi dirina mandok, ibana pe sisumbangon nama. Tu halak sisongon on mansai ringkot mangarujiruji hinadeak ni basabasa ni Debata na jinalona, asa mago roha diri (egois) i sian dirina. Asing ma antong tu parngoluon ni halak na molgaholgap, na memang so tolap hian be marhais martuduk. Angka halak sisongon on ma na tutu ingkon pargogoanta, songon nidok ni jamita on, ingkon pargogoan halak na martangan na dauk, dohot na marpat na telluktelluk i. Jala tu angka na sai kuatir di ngoluna ingkon dohononta, “PIR MA TONDIM”.

---

[1] Di pudian ni ari, dung di harajaon Romawi, huta Edom digoari ma i Idumea.

[2] Tu angka parroha na tahuton didok asa unang pola be mabiar, alai pir ma tondina, ai adong do Jahowa na martubolhon dohot mamaloshon molo tung di sada tingki ro musu/halak Edom dohot Moab balas dendam (ayt.4).

[3] Mampanghorhon situtu ma pemulihan tano i di nasida angka pangula/petani. Songon i nang di angka binatang dohot suansuanan na mangolu di atasna.

[4] Ingkon parohahononhon angka na mapitung, na nengel, na pangpang dohot na ngungu (ayt.5-6).

[5] Gabe boi nasida maribadah di Bagas Joro di bagasan las ni roha. Ai nunga dipauli Debata dalan balobung dalan na bolon ima dalan na badia (ayt.8).

Bahan Khotbah Minggu 08 Desember 2013

SERMON EVANGGELIUM MINGGU 08 DESEMBER 2013

Sakarias 9 : 9-10

Ginurithon ni: Pdt. RE. Sihotang, S.Si

Tema:

RO DO IBANA MARDONGAN HAADILON DOHOT HATIMBULON

I. Patujolo

Di tingki raja Sirus (Koresy) manggomgomi harajaon Parsia, taon 538 SM, haruar ma sada haputusan na mambahen las roha ni sude halak Jahudi na mian di habuangan Babel. Raja Sirus marhite haputuson i paloashon manang ise halak Jahudi na marsangkap naeng mulak tu Jerusalem laho paulihon hutana nang bagas joro ni Debata (patudos tu: Ezra 1:1-4). 50.000 halak ma toropna Israel na marsangkap mulak tu Jerusalem dohot marsangkap paulihon bagas joro naung sanga maloha i. Nang pe naung mardongan surat hatotopan nasida laho paulihon Jerusalem i, sai adong dope na mangambati nasida di sangkap i. Isarana, halak Samaria (Ezra 4:5), pangambation sian bupati Tatnai (Ezra 5), dohot angka raja na manggonti Sirus na so mangulahon parenta na digurithon di surat haputusan i. Sialani lan hamaolon i pola gabe 20 taon lelengna asa sidung dipauli nasida bagas joro i. Sanga do naeng mandele nasida, jala tubu tu rohana boha do ulaning, naso dihalomohon Debata do ulaon on umbahen sai pasingkat soring ro sipangambat?. Jala pola do nunga torop nasida naung hurang marsitutu tu hasisidung ni pambangunan i.

Di tingki pandelean on ma si Sakaria rap dohot si Haggai, manurirangi bangso i. Disosohon do tu bangso i asa muba sudut pandang nasida marnida hamaolon i. Ndang naso parduli Debata tu nasida, justru ala ni keperdulianna ma umbahen naeng diparo Debata Raja si palua i tu tongatonganasida. Jala ima tanda paboa na manongtong do Debata di pihakna mandongani nasida.

Togon di taon 518 SM., jongjong ma Raja Darius gabe raja di Parsi. Marsitutu do ibana mangoloi dohot padalanhon haputusan  naung tinotophon ni Raja Sirus na uju i. Di partingkian on pe asa lumumbang dihilala halak Jahudi pasidungkon pambangunan naung sanga tartunda na jolo.

II. Tafsiran

Hamaolon di na pajongjonghon huta Jerusalem dohot nang bagas joro ni Debata, mambahen menet roha ni bangso i. Alani i, parnidaan na dipasahat Sakaria tu nasida naeng pahothon roha nasida di bagabaga ni Debata, dohot naeng patoranghon lapatan ni haroro ni si Palua i di tongatonga nasida. Goar "Sakaria" i ma sada goar na umum dibagasan Padan Narobi, lapatanna:”Debata Marningot/Tuhan Mengingat”. Nunga tung balga situtu pangkirimon ni bangso i taringot tu haluaon sian gomgoman ni bangso sileban. Hinorhon ni i, tarpaimaima do nasida di haroroni sada uluan, si palua, na ro paluahon nasida sian hapariron di habuangan i. Jala marhitae angka panurirang sian si Jesaya, Jeremia, dohot nang angka panurirang na asing i, dibagabagahon do haroroni si palua i.

Hubungan ni Debata tu bangsoNa i, jotjot songon pangoli dohot oroanna. I do umbahen di goari nasida boru sion, boru Jerusalem. Digombarhon ia si palua nanaeng ro i sebagai sahalak na memiliki tolu (3) sifat dasar. Parjolo, ibana sahalak partigor. Hatigoran do nanaeng sipajongjongonna ditongatonga nasida, na gabe ojahan dame di portibi on (pat. Yes 45:21; Yer 23:5,6; Mal 4:2). Paduahon, ibana sahalak parmonang. Adong huaso di ibana laho paluahon angka na di ibana. Artina, ibana do haluaon i. Na patoluhon, ibana sahalak na serep marroha. Hoda sangat berbeda tu halode. Holan sian pardagingon, um timbo jala pasti umgogoan do hoda sian halode. I do umbahen molo diparporangan hoda do dipangke sebagai alat perang, ndang halode. Sehingga hoda i ma simbol parporangan, hagogoon manang huaso. Berbeda tu halode, jotjot manggombarhon “kelembutan dan kedamaian”.

Hureta, hoda, siap, dohot sior, i ma angka alat parporangan na dipangke angka bangso laho marporang dompak bangso na asing. Ndang adong dame nang serep ni roha di tongatonga ni portibi on. Raja nanaeng ro i, naeng mambolonghon saluhut alat parporangan i jala padaohon jolma i sian angka parbadaan. Ndang ondamondam baritahononna tu angka bangso, alai baritahononna ma hadameon tu sude bangso, ndang holan tu halak Jahudi. Sandok tu sude bangso na adong di portibi on. 

III. Refleksi

1.    Sude jolma mangidohon asa mian ma dame dibagasan ngoluna. Dame lapatanna: ndang adong parporangan; aman; ndang adong parbadaan/parsalisian. Situasi sisongonon mambahen sonang ngolunta, ndang dibagasan hatahuton. Boi denggan mulaulaon jala mangulahon angka na ringkot pamajuon angka parngoluon. Alani i do molo tubu angka persoalan di tongatonga ni masyarakat, pintor tausahaaon do pardamean. Pintor nijou do angka natuatua/tokoh padamehon persoalan di tongatonganta, asa unang gabe mangararati persoalan i gabe patubuhon hasusaan na marganjang tu pudian ni ari. Alai naeng ingotonta, marpanghusandean holan tu bisuk ni jolma ndang cukup. Dame na sian jolma, i ma dame na sian portibi on, ndang hot manontong. Dame na sian Debata do na manongtong dibagasan ngolunta. Dame na sian Debata boi mian dibagasan ngolunta, molo tabahen ibana gabe Raja di ngolunta. Gabe raja di ngolunta, lapatanna: Debata dibagasan Kristus na gabe tuan dibagasan ngolunta. Roha, pikkiran dohot pangalahonta, sudena i mardalan dibagasan aturan ni Raja na manggogomi ngolunta.

2.    Bangkona do molo di halak naung leleng dibagasan pangosagosaon ni na marhuaso, gabe tubu sada panghiriman taringot tu perubahan situasi ni ngoluna. Nang pe mangolu nasida, alai dibagasan ketidakadilan dohot penindasan do. Situasi on naeng dirubah, ringkot perubahan di ngoluna. Perubahan on tontu sahali dihirim ro sian sahalak pemimpin na jongjong di tongatonga ni nasida. Songon na masa di bangso on saonari. Mandapothon pesta demokrasi di taon 2014, bangso on dipaadop tu ragam pilihan taringot tu pimpinan na. Molo panghirimonta naeng ma adong perubahan tu na denggan, unang ma hot di angka na humurang. Pimpinan na naeng tapajongjong naeng ma boi mamboan sude rakyat tu ngolu na lam denggan. Pemimpin na songon dia sipajongjongonta? Marhite minggu Advent paduahon on, dilehon do sada syarat tu hita taringot angka pemimpin, i ma: ibana sahalak partigor, ibana sahalak parmonang, dohot sahalak na serep marroha. Sahalak nampuna angka 

3.    Jotjot taadopi hamaolon di bagasan ngolunta pajongjonghon dame i, songon nadiadopi halak Jahudi na paulihon huta nabadia i, Jerusalem. Godang halak na marsogo niroha mangambati ulaon na denggan i. Hamaolon i sanga mambahen gabe metmet roha nasida laho mangulahon ulaon na denggan i. Ulaon na denggan paulihon bagas joro ni Debata, inganan laho marsomba tu Debata, alai dihasogohon jolma na humaliang. Songoni do nang dibagasan tingki on di ngolunta. Ulaon na denggan do patupaon dame ditongatonga ni parbadaan, alai jotjotan do halak sumurut sian i, alani angka hata manang pangambation na ro sian angka na marsogo ni roha di ulaonta i. Alani i, di Minggu Adven paduahon on, dipaingot hita: Na ro do Debata manopot jolma marhite anakna na gabe jolma! Ibana ro manopot hita jolma mardongan hatigoran, hamonangan, dohot serep ni roha. Damena i mangaramoti hita di sude dalan ni nggolunta, pabalgahon rohanta asa mian dibagasan ulaon na denggan i. Ai di dok Ibana do: Martua ma sibahen dame, ai goaron do nasida anak ni Debata! (mat. 5:9). Ibana ro manopot hita, mambahen angka hita siboan dame di ngolu on gabe anakNa. Jala ramotan ni natorasna do angka anak si boan dame. Lapatanna, Debata do ama di hita, ingkon ramotanNa hita, anakna, angka na mamboan dame i di ngolunta.